Se estás buscando emprego, será necesario que dediques unha  parte do teu tempo e enerxía a preparar esa busca; é dicir, buscar traballo e require un compromiso persoal, constancia e moita motivación.

Na busca de emprego interveñen varios factores que non podemos controlar (a limitación das ofertas, a situación do mercado ou a sorte) e outros que controlamos (formación profesional, habilidades e destrezas, aptitudes e gañas de traballar).

É necesario que te fagas unha serie de preguntas e trates de darlles resposta. Unha vez que conclúas este apartado serás capaz de:

1. Establecer un obxectivo profesional para o cal deberías elaborar unha listaxe con todos os posibles traballos aos que desexas optar baseándote en:

• Os teus intereses persoais.
• A túa experiencia, formación, competencias e habilidades.
• O mercado laboral.

2. Saber que facer durante o proceso de busca de emprego:

• Canto tempo manter o teu obxectivo ou cambialo.
• Realizar outras actividades mentres tanto.

3. 1. Realizar un cuestionario de autoavaliación como pode ser o seguinte:
   • Que podo aportar á empresa?
   • Cales son os meus aspectos positivos e negativos de cara ao emprego?
   • Cales son as cualidades que mellor me definen?
   • Que condicións laborais son capaz de soportar e cales non?
   • Estaría en disposición de traballar en calquera horario e en calquera zona?
   • Teño flexibilidade e capacidade de adaptación a novas situacións?
   • Sei traballar en equipo aportando ideas e escoitando aos demais?
   • Se me comprometo con algo chego ata o final?
   • Cales son as barreiras que me impiden desenvolver un emprego e dependen de min? Como podo melloralas?

Outro método que podes empregar para o teu autocoñecemento é a análise DAFO. Axúdache a identificar as posibles dificultades e oportunidades, tanto a nivel individual como externas a ti. Neste enlace atoparás unha guía de como elaborar a túa análise DAFO